Stengt tunnel og lange køar: Burde omkøyringsveg over Bømlo vore løfta meir fram?

Det var klokka 17.17, onsdag ettermiddag denne veka, at Bømlafjordtunnelen vart stengt. Då hadde eit vogntog fått motorstans i tunnelen.

– Det sperrar feltet på veg i retning Stord, opplyste Vegtrafikksentralen Vest.

Sidan dette var tunnelen stengd i fleire timar mot kvelden i påvente av leiebil, dirigentar og serviceteknikarar for vogntoget. Køane langs E39 hopa seg då etterkvart opp, spesielt på Sveiosida.

Klokka 19.16 blei det sett i verk manuell dirigering på staden, og tunnelen vart opna i sørgåande retning. Det vart også starta ledebilkøyring etter kvart.

Først seint på kvelden, klokka 22.45, kunne tunnelen opnast igjen for fri ferdsel. Vogntoget hadde då blitt frakta ut av tunnelen.

Satt fast i køen Dette nesten seks timar etter første meldinga om havariet i tunnelen. Med så lang stenging, kjem også spørsmålet om kva alternativet er som førar i staden for å stå i kø i så mange timar.

Til Sunnhordland har mellom anna Ståle Eskeland kritisert den manglande beredskapen.

Men ikkje alle som er på europavegen tenkjer over at ein har vegen over Bømlo som alternativ til eventuell omkøyringsveg, og i denne samanheng ville den vore minst like rask, om ikkje raskare enn å bli ståande i køen i fleire timar.

Med dette kjem også ein ekstra ferjetur, og det framstår også uvissheit om når tunnelen faktisk opnar igjen. Denne problemstillinga gjeld også mest for dei som kjem frå sør.

Me utfordrar Vegvesenet på spørsmålet, men dei svarer at omkøyringsrute ikkje var aktuelt i denne samanhengen.

– Onsdag vart det frå tidleg i hendinga jobba med å få trafikkdirigentar på plass, slik at trafikken kunne leiast forbi i eitt køyrefelt. Av den grunn gjekk ein ikkje aktivt ut med mogleg omkøyringsrute. Det viste seg diverre at også trafikkdirigentane vart sitjande fast i køen, slik at trafikken ikkje kom i gang så raskt som ein hadde håpa, skriv pressevakt i Statens Vegvesen, Øystein Skotte til Bømlo-nytt.

Ikkje vore problemstilling Me kontaktar skippar, Ivar Barane på ferja MF «Bømlafjord», som driftar sambandet Langevåg- Buavåg på fylkesveg 541 for å høyra om dei merka noko til trafikken i høve den nesten seks timar lange tunnelstenginga.

– Det var ganske normal trafikk hos oss, mens tunnelen var stengd. Me la ikkje noko merke til utanom det vanlege, opplyser han.

– Pleier ein å merka auka trafikk når det skjer tunnelstengingar?

– Me har ikkje merka noko til det før heller. Men me har sett at det kjem fleire køyretøy og ombordstigande, om det blir førehandsannonsert. Men akkurat denne problemstillinga rundt når det skjer tunnelstenging, har me ikkje hatt hos oss, seier Barane.

I helga blei trafikkoperatør i Vegtrafikksentralen spurt av avisa Sunnhordland om ferje har vore aktuelt som ein del beredskapen. Då svarte han: – Ein kollega har vore kontakt med Halhjem-Sandvikvåg, som er det mest trafikkerte sambandet. Dei har fått beskjed om at dei måtte venta seg store bilmengder. At ferja på Bømlo har vore inne i vurderinga, er ikkje kjend for meg akkurat no.

Barane fortel at dei som regel er i dialog med Vegvesenet, når større stengingar skjer.

– Eksempelvis har me blitt kontakta då Bømlabrua har vore stengt, og fått beskjed om at det ville bli ekstra trafikk på sambandet. Det er mest i desse tilfellene, påpeiker han.

Burde annonsera det ved større hendingar Kommunedirektør, Kjetil Aga Gjøsæter fortel først at han reagerte på kor lang tid det tok før tunnelen opna igjen.

– Me veit jo med erfaring at slike stengingar skapar problem med enormt lange køar, og i denne samanheng skjønte eg og at ledebilen heilt klart kunne vore der tidlegare, og at berre det eine feltet vart opna, mens det andre var stengt til langt på kveld. Så dei laga seg ei forferdeleg stor floke her under denne hendinga, seier Aga Gjøsæter.

– Meiner du Vegvesenet burde gått meir aktivt med å annonsera Langevåg-Buavåg og vegen over Bømlo som omkøyringsveg, når dette skjer?

– Eg ser at dette i utgangspunktet kunne vore ei grei løysing, men då kjem jo ein del andre faktorar og usikkerheitsmoment og, både med frekvensen i avgangar med ferja, også vidare. Men eg meiner heilt klart dei burde annonsera det i større grad i høve ei større hending og lengre stenging og når Vegvesenet veit at det er ei hending som kjem til å ta lang tid, seier kommunedirektøren.

”Øystein Skotte SkotteDet viste seg diverre at også trafikkdirigentane vart sitjande fast i køen, slik at trafikken ikkje kom i gang så raskt som ein hadde håpa